IT TA'LIM UYUSHMASI

IT ta'lim Uyushmasi O‘zbekiston Respublikasi Raqamli texnologiyalar vazirligi tomonidan raqamli ta’limni rivojlantirish va malakali kadrlar tayyorlashga qo‘shgan salmoqli hissasi uchun taqdirlandi.

Mukofot Raqamli texnologiyalar vaziri o‘rinbosari Rustam Karimjonov tomonidan topshirildi.

E’tirof Uyushmaning Coursera platformasi bilan hamkorlikda amalga oshirgan ta’lim tashabbuslari natijasida taqdim etildi.

Jumladan 2025-yilda Coursera platformasiga 825 000 dan ortiq foydalanuvchi jalb qilindi, 399 000+ ishtirokchi bepul kurslarni muvaffaqiyatli yakunlab, 1 821 nafar ishtirokchi xalqaro IT sertifikatlarga ega bo‘ldi.

Shuningdek, Uyushma O‘zbekiston Global Skills Report hisobotiga ko‘ra Markaziy Osiyoda raqamli ko‘nikmalar tayyorlash bo‘yicha yetakchi davlat sifatida e’tirof etildi hamda “Coursera Connect 2025” tadbirida Outstanding Achievement Award 2025 — Global Finalist mukofotiga sazovor bo‘ldi.

Ushbu e’tirof — bizga ushbu yo‘nalishda yanada ko‘proq ishlar qilishimiz kerakligini yana bir isbotlaydi.

Fursatdan foydalanib, barcha hamkorlarimiz, jamoamiz va raqamli ta’limga hissa qo‘shayotgan har bir insonga minnatdorlik bildiramiz.

O‘zbekistonning raqamli kelajagini birgalikda qurishda davom etamiz!

Kuni kecha IT Ta’lim Uyushmasi va Koreya xalqaro hamkorlik agentligi — KOICA o‘rtasida samarali uchrashuv bo‘lib o‘tdi.

Uchrashuv davomida Uyushma tomonidan amalga oshirilayotgan ta’lim loyihalari, raqamli ta’lim yo‘nalishidagi tashabbuslar hamda faoliyat natijalari taqdim etildi. KOICA vakillari ushbu ishlarni yuqori baholab, ularning rivojlanish salohiyatini alohida e’tirof etdilar.

Shuningdek, Koreyada joriy etilgan yagona sertifikatlash tizimi va raqamli ta’lim sohasidagi ilg‘or tajribalar bilan o‘rtoqlashildi. Mazkur tizimni O‘zbekistonda, ayniqsa raqamli ta’lim yo‘nalishida joriy etish imkoniyatlari muhokama qilindi.

Uchrashuv yakunida KOICA va IT Ta’lim Uyushmasining raqamli ta’lim sohasida yagona sertifikatlash tizimini joriy etish bo‘yicha maqsadlari mushtarak ekani ta’kidlandi hamda mazkur loyiha doirasida kelgusida yana uchrashuvlar o‘tkazish, ushbu tajribani chuqur o‘rganish hamda hamkorlikda amalga oshirish bo‘yicha aniq takliflar ilgari surildi.

Bu uchrashuv xalqaro tajribani mahalliy ta’lim tizimiga tatbiq etish va raqamli ta’limni rivojlantirish yo‘lida muhim qadam bo‘ldi.

IT-ta’limi uyushmasi va Oliy ta’lim, fan va innovatsiyalar huzuridagi “Raqamli ta’lim texnologiyalarini rivojlantirish markazi” o‘rtasida o‘zaro kelishuv va hamkorlik to‘g‘risida memorandum imzolandi.

Ushbu memorandum mamlakatimizda IT sohasini yanada ommalashtirish, raqamli ta’lim ekotizimini rivojlantirish, yoshlarni zamonaviy IT kasblariga tayyorlash hamda soha xizmatlari eksport salohiyatini oshirishga qaratilgan.

Hamkorlik doirasida Hemis ta’lim platformasiga xalqaro Coursera kurslarini texnik integratsiya qilish, ta’lim platformalari o‘rtasida samarali ma’lumotlar almashinuvini yo‘lga qo‘yish, shuningdek, IT mutaxassislar uchun xalqaro onlayn ta’lim va sertifikatlash imkoniyatlarini joriy etish rejalashtirilgan.

Bugungi kunda Hemis platformasidan 1,1 milliondan ortiq foydalanuvchi foydalanadi, kunlik faol foydalanuvchilar soni esa 300 mingni tashkil etadi. Kelishuvga asosan talabalar Coursera'ning 3 mingga yaqin o'zbek tilidagi kurslaridan foydalanishlari mumkin bo'ladi. Shu bilan birga, yangi yildan ishga tushadigan Career Edu platformasiga ham ushbu xalqaro kurslarni joriy etish bo‘yicha kelishuvga erishildi.

Tomonlar, shuningdek, IT va xorijiy tillar sohasida kadrlar tayyorlash, davlat va nodavlat ta’lim muassasalari bilan hamkorlik qilish, sohaviy forumlar, ko‘rgazmalar va tadbirlarni birgalikda tashkil etish orqali IT-ta’lim sohasidagi hamkorlikni yangi bosqichga olib chiqishni maqsad qilgan.