IT TA'LIM UYUSHMASI

"Eshitishida nuqsoni bor insonlar uchun raqamli inklyuziya" loyihasi muvaffaqiyatli yakunlandi!

O'zbekiston Respublikasi Raqamli Texnologiyalar vazirligi ko'magi hamda AQSHning Sterling Foundation fondi qo'llab-quvvatlashi asosida IT Ta'lim Uyushmasi — O'zbekiston Karlar Jamiyati bilan hamkorlikda amalga oshirilgan IT o'quv trening dasturi o'z nihoyasiga yetdi.

Tantanali sertifikat topshirish marosimi bo'lib o'tdi! Barcha ishtirokchilar dastur davomida egallagan bilim va ko'nikmalari uchun sertifikat bilan taqdirlandilar.

Bundan tashqari, IT Ta'lim Uyushmasi O'zbekiston Karlar Jamiyatiga quyidagilarni rasmiy ravishda hadya qildi:

15 ta noutbuk — jamiyat a'zolari uchun

100 ta Coursera sertifikati — jamiyat a'zolari xalqaro tan olingan onlayn kurslardan mustaqil ravishda ta'lim olish imkoniyatiga ega bo'ldi

Har bir dars ishtirokchilarning yuqori ishtiyoqi va ijobiy taassurotlari bilan kechdi. Loyiha davomida ishtirokchilar ingliz tili, SMM, sun'iy intellekt, elektron hukumat xizmatlari va kiberxavfsizlik yo'nalishlarida amaliy ko'nikmalar orttirdi.

Bu loyiha — Davlat inklyuziv ta'lim siyosatini qo'llab-quvvatlovchi amaliy qadam bo'lib, xalqaro hamkorlik orqali jamiyatda tenglik va imkoniyat yaratish yo'lida amalga oshirildi.

IT ta'lim Uyushmasi tomonidan muhim ijtimoiy tashabbus — “Digital Inclusion for the Deaf” loyihasiga start beriladi

Loyiha Stirling Foundation ko‘magida amalga oshiriladi.

Tez kunlarda IT ta'lim Uyushmasi tomonidan Stirling Foundation ko‘magida hamda O`zbekiston Karlar Jamiyati bilan hamkorlikda “Digital Inclusion for the Deaf” loyihasi amalga oshiriladi.

Loyiha — O‘zbekistonda eshitishda nuqsoni bo‘lgan shaxslar uchun raqamli ta’lim imkoniyatlarini kengaytirish, ularning IT va ingliz tili bo‘yicha amaliy ko‘nikmalarini rivojlantirish hamda zamonaviy mehnat bozoriga integratsiyasini qo‘llab-quvvatlashga qaratilgan.

Loyihaning ilk bosqichi Toshkent shahrida amalga oshiriladi. Keyingi bosqichda loyiha Society of the Deaf of Uzbekistan'ning 15 ta hududiy bo‘linmalarida joriy qilinishi rejalashtirilgan.

Dastur doirasida:

✅raqamli savodxonlik bo‘yicha o‘quv kurslari tashkil etiladi;

✅darslar ishora tili tarjimonlari ishtirokida o‘tkaziladi;

✅ishtirokchilar xalqaro onlayn ta’lim platformalariga kirish imkoniyatiga ega bo‘ladi;

✅hududiy bo‘linmalarda barqaror IT o‘quv muhitini shakllantirish choralari ko‘riladi.

👨‍💻Bundan tashqari O`zbekiston Karlar Jamiyati bo'limlarida IT Lab’lar tashkil etish uchun zarur texnik jihozlar, jumladan noutbuklar bilan ta’minlanadi va bu orqali loyiha ishtirokchilarining o‘quv jarayonida ulardan foydalanishi учун sharoit yaratiladi.

Mazkur tashabbus mamlakatimizda inklyuziv ta’limni rivojlantirish, raqamli tengsizlikni qisqartirish va aholining barcha qatlamlari uchun teng imkoniyatlar yaratishga xizmat qiladi.

2-may kuni poytaxtimizda Davlatimiz rahbari tashabbusi bilan amalga oshirilayotgan "Besh million sun'iy intellekt yetakchilari" loyihasi doirasida e'lon qilingan "Milliy tanlov" g'oliblarini tantanali taqdirlash marosimi bo'lib o'tdi. Tadbirni Raqamli texnologiyalar vaziri Sherzod Shermatov ochib berdi. Vazir yoshlarni mamlakatimizning asosiy boyligi sifatida e'tirof etgan Prezidentimiz tashabbuslari haqida gapirar ekan, qisqa vaqt ichida O'zbekistonda raqamli texnologiyalar sohasida erishilgan ulkan o'zgarishlarni qayd etdi.

Taqdirlash marosimida Maktabgacha va maktab ta'limi vaziri E'zozxon Karimova va Oliy ta'lim, fan va innovatsiyalar vaziri Kongratbay Sharipov ishtirok etdi.

“Besh million sun’iy intellekt yetakchilari” loyihasi mamlakatimizda sun’iy intellekt sohasini rivojlantirish, yoshlar salohiyatini oshirish va global raqobatbardosh kadrlarni tayyorlashga qaratilgan muhim tashabbusdir.

2025-yil noyabr oyida davlatimiz rahbari tomonidan start berilgan ushbu loyihada hozirgi kunga qadar 1 mln nafarga yaqin yoshlar ta’lim olishdi. Aileaders.uz platformasida xalqaro ta’lim platformalariga tegishli 100 ga yaqin bepul kurslar joylashtirilgan bo‘lib, ular orasida Coursera, Oracle, Huawei, Apolitical, Eoppiva kabi yirik kompaniyalarning sun’iy intellekt va IT ga doir kurslari mavjud. E’tiborli jihati ushbu kurslarning 3000 taga yaqini o‘zbek tiliga ham tarjima qilingan.

Loyiha doirasidagi “Milliy tanlov”da 500 ga yaqin maktab, 45 ta oliy ta’lim muassasalari va 10 minga yaqin yoshlar va ularning ustozlari faol qatnashdi.

“Bir million o‘zbek dasturchi” loyihasining mantiqiy davomi sifatida

2025-yilning 28-noyabr kuni Prezident Shavkat Mirziyoyev tomonidan “Xalqaro sun’iy intellekt forumi”da “Besh million sunʼiy intellekt yetakchilari” loyihasiga start berildi.

Loyihada aholi va yoshlarning sun’iy intellekt bo‘yicha bilim va ko‘nikmalarini muntazam oshirish uchun aileaders.uz platformasi ishga tushirildi.

Davlat rahbari tashabbusi bilan “Besh million sun’iy intellekt yetakchilari” loyihasi doirasida “Milliy tanlov”ni o‘tkazish hamda unda bir qator yo‘nalishlar bo‘yicha o‘qituvchilar, o‘quvchilar hamda ta’lim tashkilotlarni rag‘batlantirish belgilangan.

2025-yilda “Bir million dasturchi” hamda “Besh million sun’iy intellekt yetakchilari” loyihalari 640 mingdan ortiq ishtirokchilar ta’lim olib, sertifikatlarni olishdi.

2025-yil natijalarga koʻra eng yuqori natija ko‘rsatgan ishtirokchilar “Milliy tanlov”ning quyidagi yoʻnalishlari bo‘yicha gʻolib deb topildi.

“Eng faol oliy ta’lim tashkiloti” yoʻnalishida gʻolib deb topildi hamda ularga quyidagi pul mukofotlari taqdim etiladi.

• Toshkent axborot texnologiyalari universiteti — 100 mln soʻm,

• Buxoro davlat texnika universiteti — 50 mln soʻm,

• Buxoro davlat universiteti — 25 mln soʻm miqdorida bir martalik pul mukofoti bilan taqdirlandi.

“Eng faol ishtirokchi” yoʻnalishidagi gʻoliblar aniqlandi. Ushbu yoʻnalishda 705 ta oʻquvchi, 116 ta talaba va 9 nafar yoshlar gʻolib deb topildi. Ularga noutbuk, planshet va boshqa qimmatbaho texnikalar topshirildi.

“Eng faol informatika fani o‘qituvchisi” yoʻnalishida 107 nafar gʻolib aniqlandi. Ularning 97 nafariga $1000 miqdorida bir martalik pul mukofoti berildi.

10 nafar informatika fani oʻqituvchisi esa xorijga safar yoʻllanmasini qoʻlga kiritishdi:

“Eng faol maktab” yoʻnalishida ham gʻoliblar aniqlanib, “Milliy tanlov” doirasida eng faol ishtirok etgan, Xorazm viloyati Bog'ot tumani ixtisoslashtirilgan maktabi va Navoiy viloyati Zarafshon shahridagi 13-sonli ayrim fanlar chuqur o'qitiladigan sinflari mavjud umumiy o'rta ta'lim maktablariga bosh sovrin “Prezident sovgʻasi” elektromobil topshirildi.